ގ. ޑޭޒީމާގޭ އާމިނަތު ފާއިޒާ، "އަޅުގަނޑުގެ މަންމަ" ކުރައްވާފައިވާ ހުރިހާ މަސައްކަތްޕުޅެއް އަދި މަންމަގެ ޙަޔާތްޕުޅުގައި ހޯއްދަވައި، އެއްކުރައްވާފައިވާ ހުރިހާ ފޮތެއް ވެބްސައިޓެއް މެދުވެރިކޮށް ދިވެހި ރައްޔިތުންނާ ޙިއްސާކުރުމުގެ ވިސްނުން އައީ އެއްދުވަހަކު މަންމަ އަޅުގަނޑާ ކުރެއްވި ސުވާލަކާ ގުޅިގެންނެވެ. "މަންމަ މަރުވުމުން މަންމަގެ ފޮތްތަކަށް ހައްދަވާނީ ކިހިނެތްތޯ؟" އާދެ އެދުވަހު އަޅުގަނޑު ދެންނެވީ "މަންމަ ކުރައްވާފައިވާ މަސައްކަތްޕުޅަކީ ދިވެހިރައްޔިތުންނަށް ވަރަށް މުޙިންމު ޚިދުމަތްތަކަކަށްވާތީ، އެމަސައްކަތް އާންމުކޮށް އެންމެންނާ ހިއްސާކުރުމަކީ އެންމެ ރަނގަޅު ގޮތްކަމަށް އަޅުގަނޑަށް ފެންނަކަމަށެވެ." މިކަމާ ހިތްޕުޅު ހަމަޖެހޭކަމަށް ވިދާޅުވިއެވެ. އާދެ! އެދުވަހުން ފެށިގެން އެކަން ކުރުމުގެ މަގު ތަނަވަސްވޭތޯ އަޅުގަނޑު މަސައްކަތް ފެށީމެވެ، އަޅުގަނޑަށް ވިސްނުނުގޮތުގައި މިކަން ކުރަން އެންމެ ރަގަނޅު ގޮތްތަކުގެތެރޭގައި ވެބްސައިޓެއް މެދުވެރިކޮށް ފޮތްތައް އާންމުކުރުމާއި ހުރިހާ ފޮތްތަށް ލައިބްރަރީއަކަށް ހަދިޔާކުރުމެވެ.

2010 އޯގަސްޓު މަހުގެ ތެރޭގައި މަންމަގެ ނަންފުޅުގައި ޑޮމޭންއެއް ގަތީމެވެ. އެހިސާބުން މަންމަގެ ފޮތްކޮޅުތަށް ޑިޖިޓައިޒް ކުރުމުގެ މަސައްކަތް ފެށީމެވެ. އެންމެ ފުރަތަމަ މިކަމުގައި އަޅުގަނޑަށް އެހީތެރިކަން ފޯރުކޮށްދެއްވީ އަލްފާޞިލާ ފާތިމަތު ރަޝީދާ މއ. ސަލްވީނިޔާ، އާދެ ފުރަތަމަ ހެދި ވެބްސައިޓަށްލީ ފޮތްތަށް ޓައިޕްކޮށްދެއްވީ އޭނާއެވެ. އަދި ފުރަތަމަ ވެބްސައިޓް ފަރުމާކޮށްދެއްވީ ޝާހީ އިލްޔާސް އެވެ. އަޅުގަނޑުގެ އަމާޒަކަށްވީ ފެބްރުއަރީ 2011 އަށް ނިންމާށެވެ. ނަމަވެސް މަސައްކަތް ދައްކާލެވޭ ވަރަށް ތައްޔާރުނުވަނީސް 25 ފެބްރުއަރި 2011 ގެ 06:05 ގައި މަންމަ އަވަހާރަވެއްޖެއެވެ. (ޔާﷲ އަޅުގަނޑުގެ މަންމަގެ ފާފަ ފުއްސަވައި ހެޔޮ رحمة ލައްވާ ސުވަރުގޭގެ ދާއިމީ نعمة މިންވަރު ކުރައްވާށި آمِين ).

އަޅުގަނޑު ހިތާމަކުރާ ކަމަކަށް އޮތީ މިމަސައްކަތުގައި މަންމަގެ ފާޑުވިދާޅުވުމެއް ލިބިފައި ނުވާތީއެވެ. އެއީ މިސައިޓަށް ލިބުނު އެންމެ ބޮޑު އުނިކަމެއްކަމުގައި އަޅުގަނޑު ދެކެމެވެ. އެވެބްސައިޓް ލޯންޗުކޮށްދެއްވީ މަންމައަށް ސާޅީސް ވީ ދުވަހު މޯލްޑިވްސް ނޭޝަނަލް ޔުނިވާރސިޓީ (އެމް.އެން.ޔޫ.) ގައި އެ ޔުނިވާރސިޓީގެ ވައިސް ޗާންސަލަރ އަލްފާޞިލް ޑރ. ޙަސަން ޙަމީދެވެ.

މިފަހަރު މިލޯންޗުކުރި ސައިޓު ހެދުމަށް މިހޭދަވި އަހަރުތަކުގައި އެކިއެކި ފަރާތްތަކާ މަޝްވަރާކޮށް ހެދިޔަސް، ވެބްސައިޓް ފަރުމާކުރުމުގެ މަސައްކަތް ކާމިޔާބާއެކު ނިމުނީ އަލްފާޞިލް އިސްމާއީލް ސޮބާހް މިކަމާ ހަވާލުވީފަހުންނެވެ. އަދި މިސައިޓަށްލުމަށް މިފަހަރު ސްކޭން ކޮށްދެއްވީ ދެބޭފުޅުންގެ ނަންވެސް ފާހަގަ މިކޮށްލަނީ ޝުކުރުވެރިކަމާއެކުގައެވެ. އެއީ އަލްފާޟިލާ އާޝިޔާ ލުތުފީ މއ. ބޮލިގެ، އަދި އަލްފާޟިލާ އާއިޝަތު ނަހުލާ ހ. އާބާދު.

މިސައިޓުގެ ޒަރިއްޔާއިން ދިވެހި ދަރިންނަށް މުޙިންމު އިރުޝާދުތަކަކާއި ތަރުބިއްޔަތުތަކެއް ލިބޭނެކަމަށް އަޅުގަނޑު ޤަބޫލުކުރަމެވެ. މިމަސައްކަތަކީ ތާރީޚީގޮތުންނާއި އަދަބީގޮތުން މުއްސަނދި އަދި އެހާމެ އަގުހުރި ޚިދުމަތްތަކެއް ކަމަށްވާތީ މިމަސައްކަތްޕުޅުތަށް އިޙްތިރާމާއެކު ބޭނުންކުރެއްވުން އެދެމެވެ.