އާމިނަތު ފާއިޒާ އޭނާގެ އަމިއްލަ މަސައްކަތްޕުޅު އާންމުކުރައްވަން ފެށްޓެވީ 1950 ގެ އަހަރުތަކުގެ ތެރޭގައެވެ. އެ ދުވަސްވަރު، ދިވެހިރާއްޖޭގެ ފުރަތަމަ ރައީސް، މުޙައްމަދު އަމީން ދީދީ، "ޅެންވެރިންގެ ގުލްޒާރު" އުފެއްދެވިއެވެ. އެ ގުލްޒާރުގެ ތެރެއިން އެދުވަސްވަރު އުޅުއްވި ޅެންވެރިންނަށް އެކި ލަޤަބުތައް ދެއްވިއެވެ. އެގޮތުން، އާމިނަތު ފާއިޒާއަކީ، ޅެންވެރިންގެ ގުލްޒާރުގެ ޑޭޒީ މަލެވެ. އެހާ ހިސާބުން ފެށިގެން، ޅެންތަކާއި މަޒުމޫނުތައް، މަޖައްލާތަކާއި ނޫސްތަކުގައި ޝާއިޢުކުރެއްވިއެވެ. އަދި "ޑޭޒީމާ"ގެ ނަމުގައި ޝާއިޢު ކުރައްވަން ފެށްޓެވި ފޮތްތަކެއްގައި އޭނާގެ ޅެންތައް އާންމު ކުރެއްވިއެވެ. އަދި "ޖަޒްމާތު" ނަމުގައި ވާހަކަފޮތެއްވެސް ނެރުއްވިއެވެ. ފާއިޒާގެ ޅެންވެރިކަމާއި ލިޔުންތެރިކަމުގެ ހަޔާތްޕުޅުގައި، ޢިޝްޤާއި، އިޖުތިމާޢީ މައްސަލަތަކާއި، ދީނާއި، ޤައުމީ އެއްބައިވަންތަކަމާއި، ޤައުމީ މުނާސަބަތުތައް ހިމެނޭހެން، ތަފާތު މައުޟޫޢުތަކަށް ޅެން ލިޔުއްވާފައި ވެއެވެ.

ފާއިޒާ ވަނީ، ރައީސް މުޙައްމަދު އަމީން ދީދީ، ދިވެހިރާއްޖޭގައި އުފެއްދެވި ފުރަތަމަ ސިޔާސީ ޕާޓީ، "ރައްޔިތުންގެ މުތަޤައްދިމް ޕާޓީ" ގެ އެޑްވައިޒަރީ ބޮޑީގައި ޚިދުމަތް ކުރައްވާފައެވެ. ކުރީގެ މަދަރުސަތުއްސަނިއްޔާގައި، މުދައްރިސެއްގެ ގޮތުގައި މަސައްކަތް ކުރައްވައި، އެ މަދަރުސާގެ ޑެޕިއުޓީ ހެޑްމިސްޓްރެސްގެ މަގާމުވެސް ފާއިޒާ އަދާކުރެއްވިއެވެ. އަދި ފާއިޒާ ވަނީ، މޯލްޑިވްސް ސެންޓަރ ފޮ ހިސްޓޯރިކަލް އެންޑް ލިންގުއިސްޓިކް ރިސަރޗުގައި (ދިވެހިބަހާއި ތާރީޚު ދިރާސާކުރާ ޤައުމީ މަރުކަޒުގައި) 27 އަހަރަށް ވުރެ ގިނަ ދުވަހު ޚިދުމަތްކުރައްވައި، އެ ދުވަސްވަރު، "ދިވެހިބަހުގެ ރަދީފު" (ދިވެހި ޑިކްޝަނަރީ) އެކުލަވާލުމުގައި އެހީތެރިވެދެއްވާފައެވެ.

ފާއިޒާއަށް ލިބިވަޑައިގެންފައިވާ އިނާމުތަކުގެ ތެރޭގައި، ދިވެހި ޅެންވެރިކަމުގެ ރޮނގުން 1980 ވަނަ އަހަރު ލިބިވަޑައިގެންނެވި ޢާންމު ޚިދުމަތަށް ހިތްވަރުދިނުމުގެ ޤައުމީ އިނާމާއި، ދިވެހި ޅެންވެރިކަމުގެ ރޮނގުން 1996 ވަނަ އަހަރު ލިބިވަޑައިގެންނެވި ޝަރަފުވެރިކަމުގެ ޤައުމީ އިނާމު ހިމެނެއެވެ. އަދި ކުޑަކުދިންނަށް ޚާއްޞަ ފޮތް ސަރުކާރު ގަބޫލުކުރައްވާ ފެންވަރަކަށް ދިވެހިބަހުން ލިޔުއްވައިގެން ސަރުކާރުން ދެއްވި ޚާއްޞަ އިނާމު 2005 ވަނަ އަހަރު ލިބިވަޑައިގެންފައި ވެއެވެ. އެ ފޮތަކީ، އުމުރުން 12 އަހަރާއި 14 އަހަރާ ދެމެދުގެ އުމުރުފުރާއަށް ޚާއްޞަ ކުރައްވައިގެން ލިޔުއްވި އަނބޮއްފުޅާއި ދަނބޮއްފުޅުގެ ރައިވަރު ފޮތެވެ.

ޅެންވެރިކަމުގެ ބަގީޗާގައި ފާއިޒާ ހެއްދެވި އެންމެ ފަހު ޅެމަކީ، އިސްކަންދަރު ސްކޫލްގެ ރަންޔޫބީލުގެ މައްޗަށް 5 ފެބްރުއަރީ 2011 ގައި ހެއްދެވި ޅެމެކެވެ. ޅެންވެރިކަމުގެ ދާއިރާގައި، ފާއިޒާގެ އެންމެފަހު އާންމު ފެނިލުމަކީ، ދިވެހިބަހާއި ތާރީޚަށް ޚިދުމަތް ކުރާ ޤައުމީ މަރުކަޒުން އިންތިޒާމު ކުރި، "ޅެންވެރީންގެ ހަވީރު" ގައި ބައިވެރިވެވަޑައިގެންނެވި ބައިވެރިވެވަޑައިގަތުމެވެ.

ދިވެހި ޅެންވެރިކަމުގެ "ޑޭޒީމާ" އާމިނަތު ފާއިޒާ އަވަހާރަވީ 24 ފެބްރުއަރީ 2025 ދުވަހުގެ ރޭގަނޑުގެ ވަގުތެއްގައި ސްޓްރޯކެއް ޖެހިވަޑައިގެން އިންދިރާގާނދީ މެމޯރިއަލް ހޮސްޕިޓަލުގައި ފަރުވާދެމުން ގެންދަނިކޮށް، 25 ފެބްރުވަރީ 2011 ވީ ހުކުރު ދުވަހުގެ ހެނދުނު 6 ޖެހިތަނާއެވެ. ފާއިޒާ އަވަހާރަވީ، އުމުރުފުޅުން 86 އަހަރުގައެވެ. ފާއިޒާގެ ޖަނާޒާގައި، ސިޔާސީ އަދި ސަޤާފީ ކަންކަމުގެ ޢިއްޒަތްތެރިން ބައިވެރިވަޑައިގެންނެވިއިރު، ހުކުރު ނަމާދަށްފަހު، މަސްޖިދުއްސުލްޠާން މުޙައްމަދު ތަކުރުފާނުލް އަޢުޡަމްގައި ކަށުނަމާދުކޮށް، ވަޅުފުޅުލީ، މާލޭގައި މައްޗަންގޮޅީ އާ ސަހަރާގައެވެ.

ފާއިޒާއަށް ލިބިވަޑައިގެންފައިވާ ތިން ބޭފުޅުންނަކީ، އަޙްމަދު ޢައްބާސްއާއި، އާމިނަތު ޢައްބާސްއާއި، މުޙައްމަދު ޙިލްމީއެވެ. ތިން ބޭފުޅުންނަކީވެސް، އެކި ފަންނުތަކުގެ ހުނަރުވެރިންނެވެ. އަޙްމަދު ޢައްބާސްއަކީ، މޮޅު ކުރެހުންތެރިއެކެވެ، ރިޒޯޓުތަކާއި މިސްކިތްތަކާއި މި ނޫންތަންތަން ފަރުމާކުރައްވާފައިވާ ބޭފުޅެއްވެސް މެއެވެ. އަދި މަގުބޫލު ކާޓޫނުތަކެއްވެސް ކުރައްސަވާފައިވާ ބޭފުޅެކެވެ. ޤައުމީގޮތުން އެންމެ ފާހަގަކޮށްލެވޭ، އެންމެ މުހިންމު ކަމަކީ، ރައީސް މައުމޫން ޢަބްދުލްޤައްޔޫމުގެ ރައީސް ކަމުގެ ދައުރުގައި، ދިވެހި ރުފިޔާ ފަރުމާކުރުމުގައި އިސް ދައުރެއް އަދާކުރެއްވީ، އަޙްމަދު ޢައްބާހާއި މަރުޙޫމް މައިޒާން ޙަސަން މަނިކު ކަމެވެ. އަޙްމަދު ޢައްބާހުގެ ކޮއްކޮ، މަރްޙޫމާ އާމިނަތު ޢައްބާސްއަކީވެސް މޮޅު ޅެންވެރިއެކެވެ. މުޙައްމަދު ޙިލްމީއަކީ، ސްކެޗް ކުރެއްސެވުމާއި، ނޫހަށް ލިޔުއްވުމާއި، ފޮޓޯ ނެންގެވުމާއި، ދިވެހި ފިލްމީ ދާއިރާގައި ސްކްރީންޕްލޭ ލިޔުއްވުމާއި، ފިލްމު ހެއްދެވުމާއި، ރޭޑިއޯ ޑްރާމާ ލިޔުއްވުމުގެ ފަންނުވެރިއެއްވެސް މެއެވެ.